Zein maitasun da hori? Eskritura Santuak dilectio hitza erabiltzen du, ez dela sentimenduzko maitasunaz bakarrik ari adierazteko. Nahimenaren erabaki sendoa dela esan nahi du. Dilectio, electio-tik dator, aukeratzetik. Nik esango nuke kristauki maitatzea maite nahi izatea dela, Kristorengan arimen ona bilatzeko erabakia hartzea, inolako diskriminaziorik gabe, beraientzat gauzarik onena lortzen saiatuz lehenik: Kristo ezagutu eta Beraz maitemindu daitezela.

Jaunak bultzatzen gaitu: ongi jardun zaitezte gorrotatzen zaituztenekin eta otoitz egin pertsegitzen eta kalumniatzen zaituztenen alde²². Gizalegez, izan daiteke estimurik ez sentitzea uko egingo gintuzketenen alde, haiengana hurbilduko bagina. Baina Jesusek eskatzen digu ez diezaiegula gaizkiaz erantzun gaiztakeria; ez dezagula aukerarik galdu haiek bihotzez zerbitzatzeko, kostata ere; ez ditzagula inoiz ahaztu gure otoitzetan.

Dilectio hori, maitasun hori, ñabardura maitagarrigoez betetzen da fedean gure senide direnei dagokienean, eta bereziki, Jainkoak hala ezarri baitu, gugandik hurbil lan egiten dutenei dagokienez: gurasoak, senarra edo emaztea, seme-alabak, anai-arrebak, adiskideeak, lagunak, auzokoak. Maitasun hori ez balego, giza maitasun jator eta garbia, Jainkoarengana zuzendutakoa eta Harengan oinarritua, ez litzateke egiazko karitaterik izango.