Jainkoaren aurrean erantzule

Jainkoak hasieran egin zuenean, aukeramena eman zion gizakiari (Si, XV, 14). Ez litzateke horrela gertatuko aukeratzeko libre ez balitz⁴¹. Askatasunez egiten ditugun egintza guztien erantzule gara Jainkoaren aurrean. Ez da hemen lekurik anonimatuarentzat; gizakia bere Jaunaren aurrean aurkitzen da, eta bere borondatean dago adiskide edo etsai bezala bizitzera erabakitzea. Horrela hasten da barne-borrokaren bidea, bizitza osorako eginkuzun dena, lurrean dabilen bitartean inork ez baitu bere askatasunaren osotasuna lortu.

Gure kristau fedeak, gainera, guztiei askatasun giroa ziurtatzera garamatza; hasteko, fedea aurkeztean, era guztietako behartze engainagarriak baztertuz. Kristorengana herrestaka eramaten bagaituzte, nahi gabe sinesten dugu; indarkeria erabiltzen da orduan, ez askatasuna. Norberak nahi ez duela sar daiteke Elizan; norberak nahi ez duela aldarera hurbildu; nahi gabe ere har dezake Sakramentua. Baina nahi duenak bakarrik sinets dezake⁴². Eta argi dago, arrazoinaren adinera heldutakoan, Elizan sartzeko eta Jainkoak etengabe egiten dizkigun deiei erantzuteko, askatasuna beharrezkoa dela.