Pikondo antzua

San Mateok esaten digu ere Jesus gosez zetorrela Betaniatik itzultzean²⁴. Beti hunkitzen nau Kristok, batez ere egiazko Gizon, hutsik gabea dela ikustean, guztiz Jainko delarik ere, gure ezereza eta bakoitzaren giza ahultasunak ere ongi erabiltzen guri erakusteko; horrela geure burua osorik –garen bezala– Aitari eskain diezaiogun, Berak atseginez onartzen baitu erre-opari hori.

Goseak zegoen. Unibertsoaren Egilea, gauza guztien Jauna, gose! Jauna, eskerrak ematen dizkizut, idazle sakratuak –Jainkoaren goi-argiari esker– zertzelada hau utzi digulako pasarte honetan, xehetasun honen bitartez, Zu gehiago maitatzera behartzen bainau eta zure Gizatasun txit Santua ikusteko gogo bizia izatera bultzatzen! Perfectus Deus, perfectus homo²⁵, guztiz Jainko eta guztiz Gizon, hezur-mamizkoa, zu bezala, ni bezala.