Jainkoa entzuteko

Eskritura Santura joaten bagara, umiltasuna behar-beharrezko baldintza dela ikusiko dugu Jainkoa entzutera prestatzeko: Zuhurtzia umiltasunaren lagun⁴, azaltzen du Esaera Zaharren liburuak. Umiltasuna geure buruari garen bezala begiratzea da, leungarririk gabe, egiarekin. Eta ezer gutxi balio dugula ulertzean, Jainkoaren handitasunera zabaltzen gara: horixe da gure handitasuna.

Zein ederki ulertzen zuen hau Ama Birjinak, Jesusen Ama Santuak, munduan izan diren eta izango diren sorkaririk gorenenak. Mariak Jainkoaren boterea goraipatzen du: ahaltsuak goi-postuetatik bota eta ezerezak gora jaso ditu⁵. Eta Jainkoaren probidentzia hau berriro bete dela Berarengan kantatzen du: bere mirabe ezerez honengan jarri baititu begiak, horregatik dohatsu deituko naute guztiek gaurdanik⁶.

Maria, bere bihotz guztiz garbian, santutasunez eraldatuta agertzen da Jainkoaren umiltasunaren aurrean: Espiritu Santua jaitsiko da zuregana, eta Goi-goikoaren indarrak bere itzalpean hartuko zaitu; horregatik zuregandik jaioko den Santua, Jainkoaren Seme deituko dute⁷. Mariaren umiltasuna hondorik gabeko grazia multzo izugarri horren ondorioa da, bere erraietan Hirutasun Santuaren Bigarren Pertsona gizon egitearekin eman dena.