Mirets ezazue ere San Pauloren jarduera. Kristoren irakatsiak zabaltzeagatik preso dagoela, ez du Ebanjelioa azaltzeko aukerarik galtzen. Festo eta Agriparen aurrean, ez dauka hau agertzeko zalantzarik: Jainkoaren laguntzarekin, handi eta txikien aurrean testigantza egiten jarraitu dut gaurdaino; nik ez dut Profetek eta Moisesek aurrez iragarria besterik esaten, hau da, Kristok sufritu egin beharko zuela; baina, hilen artetik aurrena piztuz, bere argia ekarriko ziela bere herriari eta jentilei³⁸.

Apostolua ez da isilik gelditzen, ez du bere sinesmena eta bere apostolutza lana ezkutatzen, bere jarraitzaileen gorrotoa eragin zuena: jende guztiari salbamena iragartzen jarraitzen du. Eta ausardi ikusgarriaz, Agripari aurre egiten dio: Sinesten al diezu profetei? Ziur nago sinesten diezula³⁹. Eta Agripak dioenean: beste pixka bat eta kristau bihurtuko nauzu, Paulok hari: pixka bat nahiz puska bat, Jainkoak nahi izan dezala, zu ez ezik, gaur niri entzuten didaten guztiak, ni naizena izatea… katea hauek aparte⁴⁰.