Bihotz jakinduria hau, zuhurtasun hau inoiz ez da San Paulok aipatutako haragiaren zuhurtasun bihurtuko¹⁵: adimen argikoak izanik, Jauna bilatu eta maitatzeko erabili nahi ez dutenena. Egiazko zuhurtasuna Jainkoak iradokitzen dionari adi-adi dago eta, arretaz entzunez, salbameneko agintzariak eta egiteak jasotzen ditu ariman: Goresten zaitut, Aita, zeru-lurren Jauna, gauza hauek jakintsu eta ikasiei ezkutatu dizkiezulako eta jende xumeari agertu¹⁶.

Bihotz jakinduria, beste hainbat bertute gidatu eta zuzentzen dituena. Zuhurtasunak egiten du ausarta gizakia, zentzugabekeriarik gabe; ez dio uko egiten, erosotasunaren aitzakia ezkutuek bultzatuta, Jainkoaren asmoen arabera erabat bizitzeko egin behar den ahaleginari. Zuhurraren neurritasuna ez da ez geldotasuna ez misantropia; haren zuzentasuna ez da gogorkeria; haren pazientzia ez da morroikeria.