Kristaua bertute hauek lortzen saiatzen bada, bere arima Espiritu Santuaren grazia modu eraginkorrez hartzera prestatzen da: eta giza nolakotasun onak, Parakletoak bere ariman jartzen dituen mozioen bidez, indartu egiten dira. Hirutasun Santuaren Hirugarren Pertsonak –arimarenbizilagun atsegina²⁴– bere dohainak oparitzat ematen ditu: jakinduria, adimena, kontseilua, sendotasuna, zientzia, jaiera, Jainkoaren beldur santua²⁵.

Orduan poza eta bakea nabaritzen dira²⁶, bake pozgarria, barne-poztasuna alaitasun giza-bertutearekin batera. Gure begien aurrean dena suntsitzen dela bururatzen zaigunean, ezer ez da suntsitzen, Zu baitzara, ene Jainko, nire babeslea²⁷. Jainkoa gure ariman bizi bada, gainerako gauza guztiak, garrantzitsuak badirudite ere, behin-behinekoak, iragankorrak dira; gu, aldiz, Jainkoagan iraunkorrak gara.

Espiritu Santuak, jaiera dohainaren bidez, Jainko seme-alabak garela zalantzarik gabe jakitera laguntzen digu. Eta Jainkoaren seme-alabek, zergatik egon behar dugu goibel? Tristura berekoikeriaren zaborra da; Jaunarentzat bizi nahi badugu, ez zaigu alaitasunik faltako, gure oker eta miseriak ikusita ere. Alaitasuna otoitz bizitzan sartzen da, eta kantatzen hastea baino beste biderik ez zaigu gelditzen; maite dugulako, eta kantatzea maiteminduen kontua delako.