Kristoren Gizatasun Santua

Nola gainditu eragozpen horiek? Nola lortuko dugu hain astuna iruditzen hasi zaigun gure erabaki hartan geure burua indartzea? Gure Ama Maria guztiz Santuak erakusten digun ereduari begira: ibilbide zabal bat, beti Jesusengandik pasatzen dena.

Jainkoarengana hurbiltzeko, bide zuzena hartu behar dugu: Kristoren Gizatasun guztiz Santua. Horregatik, Jaunaren Nekaldia kontatzen duten liburuak irakurtzea aholkatzen dut beti. Idatzi horiek, benetako jaieraz beteak, Jainkoaren Semea dakarkigute burura, gu bezala Gizon eta egiazko Jainko; Berak maitatzen du eta bere haragian sufritzen du munduaren berrerosketarengatik.

Arretaz begira iezaiozue kristauen artean errotuenetako dagoen debozio bati: Arrosario Santuari. Elizak gertaldiak kontenplatzera bultzatzen gaitu; gure buruan eta irudimenean Maria Santuaren poza, nahigabea eta aintzarekin batera, Jaunaren jarraibide miragarria betiko grabatuta gera dadin: haren hogeita hamar urte ilunetan, predikatzen ibili zen hiru urteetan, Nekaldi iraingarrian eta Berpizte aintzatsuan.

Kristori jarraitu; hortxe dago sekretua. Hain hurbiletik jarraitu, Berarekin bizi gaitezen, lehenengo hamabi haiek bezala; hain hurbiletik, Berarekin bat egin gaitezen. Ez da denbora luze pasako esan arte, graziari oztoporik jartzen ez badiogu, Jesu Kristo Gure Jaunaz jantzi garela¹². Jauna gure jardueran islatzen da, ispiluan bezala. Ispilua behar bezalakoa baldin bada, gure Salbatzailearen aurpegi maitagarria itxuraldatu gabe jasoko du, karikaturarik gabe: eta besteek miresteko eta jarraitzeko aukera izango dute.